Camino de Santiago

Wie im Flug sind die Oschterferie verbi gange, ines paar Täg wird d Schuel scho wieder afange und zum erhole hani na chum Ziit gha. Ich han nämlich d Wuche demit verbracht en Teil vom Camino de Santiago z mache. Für all wos nid wüssed, das isch en ganz lange Weg wommer (meischtens) z Fuess macht, bis uf Santiago zude grosse Kathedrale, er het verschiedeni Afäng, unteranderem au ide Schwiz, uf Dütsch heisst er Jakobsweg.
Jedefalls han ich mit öppe 30 andere Ustuschschüeler 120kilometer devo gmacht und ich chan eifach nur sege, es isch unglaublich gsi! Die einte wüssed viellicht, dass ich i de letschte Mönät nid immer so begeischteret gsi bin vo AFS, ja ich mich mengisch sogar wahnsinnig über d Organisation ufgregt han. Aber ich muen sege ich bereus kein Moment, dass ich mich agmeldet han. All vo eus sind so verschiede und voed ganze Welt, aber es isch glich als würemer eus scho ganz und gar kenne, all die AFSer sind eifach mini zweiti  Familie. Und alles wasmer i dere Wuche zemme duregmacht hend, het das Gfühl nur na verstärcht.
Am erschte Tag wommer eus all mit eusne riesige Rucksäck, de obergrusige Wanderstiefel und de riese Regeschütz parat gmacht hend für die erscht Etappe (24km) hemmer eus, oder jedefalls ich mich, uuunglaublich lächerlich gfühlt. Aber scho nachemne Wili isch d Lune eifach super gsi, s Wetter isch trotz de Regegüss ab und zue würkli guet gsi und motiviert simmer sowieso gsi. Uf halbem Weg hend ich und mis Grüppli denn es paar Ire kenne glehrt und mir hend es Wili mitneh gredet. Ihre irisch Akzent isch eifach zum sterbe luschtig gsi :P Und das isch denn nid s einzige Mal gsi, wo mer Lüt ufem Camino kenne glehrt hend, es  isch eifach so gsi, dass mer halt mit allne chli afangt rede und das isch uf jedefall mega interessant! Eimal wo zwei Kollegine und ich erschöpft ine Bar sind go Wasser poschte, simmer zum bispiel mitem Wirt is Gspöch cho und am Schluss hetter eus als chlini Wegverpflegig nid nur gueti Wort sondern auna grad gratis Brownies mitgeh :D

De zweiti Tag isch denn scho chli anderscht gsi, es het gregnet und grengnet und gregnet und nüme ufghört, de ganz Bode isch ufgweicht gsi und ich glaub niemert vo eus isch au nur es bizli troche blibe. Umso grösser isch natürlich d Erliechterig vom z Abig ide Herberg acho gsi und ich die guet Luune vo dem Abig/Nacht isch echt chum na z übertreffe gsi. Usserdem sind all chli all am massiere gsi, will eus eifach alles weh tah het. Aaaber das isch natürlich alles na nüt gsi im Gegesatz zum nächschte Tag, dasmal sind 30km ufem Plan gstande und es het abegleert wie nüt. De ganz Bode isch so ufgweicht gsi, dassmer s Gfühlt gha hend, mer versinki jetzt denn im Schlamm. und spötischtens wenn dini Schueh sich wie chlini Ozean agfühlt hend, jedi vo dine Chleiderschichte durchnässt und dini Haar plotschnass gsi sind, isches der eifach nur na sche*** egal  gsi wied eigentlich usgesch und über d Erinnerig dasses mir am erschte Tag na peinlich gsi isch de grusig Plastikponcho gege de Rege azlege, hani nur na chöne lache. Nachem Zmittag sind denn de Albert en Kolleg vo Barcelona und ich chli z spaat wieder losglofe zum wie immer mitde erschte Gruppe mitzhalte und wo eus plötzlich ufgfalle isch, dass mir zude hinderschte ghöred, hemmer gfunde das chans nid si, euses Tempo azoge und versuecht die vorderschte wieder izhole. Mir sind so schnell gsi, dass mer öppe 6 kilometer pro Stund gmacht hend, was mit dene Rucksäck, em Rege, em rutschige Bode und immer wieder de Hügel wommer duruf hend müesse (obwohl ich zuegib, dass da de Albert mir mengisch mitem Rucksack ghulfe het :P) nid all zu liecht gsi isch. Jedefalls hemmers gschafft und sind denn zemme mit de 1. Gruppe acho, wodure ich mich nid nur mega stolz han chöne fühle, sondern au zerscht go dusche, Gott sei Dank!
Naja ich wird jetzt nid na allzu feschd uf Detail igah ich chan nur sege, absolut alli hend die ganze Füess vo Blase gha, die meischte simmer nur na ghumplet, eusi Chleider sind immer so durchweicht gsi vom Rege, dass sie nid emal über Nacht tröchnet sind, all eusi Schueh sind so volle Schlamm gsi, dass mer sie chum na het chöne vonenand underscheide und a Muskelkater hets bi Gott au nid gmanglet. Aber de Moment, wenn du nach 5 Täg voller Astrengig und Liide endlich z Santiago achunsch, die letscht Strass aberennsch und denn endlich vor de Kathedrale stasch, isch eifach unbeschrieblich und entschädigt für alles!
Es isch eifach e unbeschrieblichi Erfahrig gsi, all neue Lüt woni troffe han, all neue Wanderlieder und immer de befriedigendi Moment wennd am Abig vomne lange Tag ide Herberg acho bisch. Es isch eifach öppis uf das ich richtig stolz bin und egal wie viel mir glitte hend, ich wills uf jedefall namal mache!

Sunne hets nur am 1. Tag gha :P

Endlich z Santiago!