Schnell go poschte

so es wird dringend emal wieder Ziit zum en Blog schriebe. I letschter Ziit bini erschtens nid würkli dezue cho und zweitens isch eh langsam alles echli Alltag und es git nüm jeeedi Wuche so viel neus z berichte.

Die Wuche hemmer jetzt die letschte Prüefige gha und ich hoff doch schwer dass ab jetzt all chli entspannter sind. Ich mein vor es paar Wuche het na min chline 8- jährige Brüeder mit ganz ernschthaften Gsicht gseit: 'S Lebe isch hert.' und all mini Kollege vode Schuel hend vorallem ide letschte zwei Wuche chum für was anders ziit gha als lere. Aber ebe, jetzt gahts uf Wiehnachte und Neujahr zue und d Vorfreud isch riesig.
De Samschtig hend d Ana, ich und na zwei Kollegine en chline Usflug uf Santiago gmachd, ines riesigs Ichaufszentrum, zum eusi Outfits für Silveschter z chaufe. Bevor ich uf Details igha schnell e churzzemmefassig vo was mir gmacht hend: 1. Mit suuper tolle Luune z Santiago acho 2. völlig veregnet werde und aaall eusi ichäuf ufem Bode versträue 3. Mit fremde Lüt a ihrem Stubestisch sitze, fernseh luege und Pizza esse.

Smoothie & Frosen Yoghurt

Aber jetzt mal na vo Afang ah. Will mer da z Spanie chum de Zug brucht, sind bini Kollegine scho z Vigo a Bahnhof völlig überdreht gsi und hend meh fotis gmachd, als Japaner uf Reise. Eusi eh scho gueti Luune, isch denn durd Decki sobald mer im Ichaufszentrum acho sind. Es het eifach alles gha und isch so gross gsi, dass mer Müeh gha hend eus nid z verlaufe. Denn het euse riese Sache ussueche und Zügaprobier- Marathin agfange. Ich chan nur sege fühlsch dich dete wien en Star. Usse a dini Umkleidekabine wird din Name gschriebe und ine drin hets en Chnopf wod chasch drucke, zumd Verchäuferin rüefe wennd öppis bruchsch.
Nach guet 5 Stund hemmer denn all euses Züg zemme gha und sind na in obere Stock es Frozen Yoghurt und en Smoothie go hole. Wommer denn aber usem Ichaufszentrum usesind zum de Bus han Bahnhof ne hets agfange regne. Uf öppe halber Strecki zum Bahnhof hemmer denn gmerkt dass es sauknapp wird mit em Zug und bi dem Glück wommer gha hend isch d Bushaltestell nid mal genau bim Bahnhof gsi. Also stiege mir us und renned i vollem Tempo los, immerna belade mit nöch a ei Million vo Täschene. Die Täschene sind us Papier gsi und die Tatsach i Kombination mit em Rege het gar nid chöne guet cho. I vollem Sprint hets eus alles zerrisse und eusi gaaanze Ichäuf sind uf de nasse Strass verteilt glege. Mir hend denn alles eifach packt und sind mit dem Züg ide Ärm wiiter grennt. Ich will mer chum vorstelle wie lächerlich mir usgseh hend, aber uf jedefall hani scho lang nüm so feschd glached. :D

Zmizzt ide Nacht, a irgendme Bahnhof

Wommer denn am Bahnhof acho sind, die nächschte guete Neuigkeite, de letschti Zug isch scho vor öppe ere Halbstund abgfahre, genau so wie jede Bus und alli andere Fahrglegeheite wo eus au nur id Nöchi vo Vigo hetted chöne bringe. Mir sind denn halb gschockt, halb amüsiert zerscht mal eifach chli verwirrt dete gsesse. S Bahnhofspersonal het sich scho agfange Mitleid z ha und sie hend eus denn sogar neui Plastiktütene bsorgt zum wenigschtens all eusi Sache wieder chöne izpacke. Denn isch de Nerea zum Glück in Sinn cho, dass sie mal es Meitli imne Lager kenne glehrt het wo z Santiago wohnt. Zum dere ihri Nummere usefinde het sie denn ihrere Tante aglüte und die het eus aber direkt a es Pärli wo sie kennt verwiese wo au dete wohnt.
So isches also cho, dass en völlig Fremde eus am Bahnhof isch cho abhole und zu sich heignoh het, wo sini Frau scho debi gsi isch eus zwei Zimmer parat z mache. Denn hends eus e Pizza bstellt und mir hend die halb Nacht mit ihne über dies und das gredet (under anderem über ihri 2 Reise id Schwiz, wos mal amne Tag 80 Franke für Schoggi usge hend :D ) Denn simmer mit usglehnte Pijamas go schlafe gange und am näschte Morge wommer ufgwacht sind, isch de Zmorge scho ufem Tisch gstande. Nach einere Million Mal Danke sege, hends eus denn uf de Zug bracht.
Alles i allem: FUE LA HOSTIA! so sache passiered au immer mir ^^

Ana, Nerea und d Fabiola i eusem 'Hotelzimmer'

Vo Schwänze und Spicke

S letschte Wuchenend isch sone richtigi Usziit vo Spanie gsi. Es isch wieder mal sones langs gsi, mit 4 Täg, drum bini denn scho am fritig Morge id Stadt uf Vigo und bis am Samschtig Abig nüm hei uf Salceda. Das isch so s erschte Mal gsi, woni elei de Bus hi und wieder zrug gnoh han und da d Bushaltestell ¨ppe e halbstund Weg vom Zentrum entfernt isch, hani doch chli Angscht gha dass ich mich verlaufe^^. Waas denn au passiert isch, aber hey Vigo het immerhin 300`000 iwohner, da chan das mal passiere. Jedefalls hani denn nach nur eimal chli verwirrt nachem Weg fröge mis Ziel gfunde. Und zwar d' Milena :D Mit ihre bini denn als allererschts mal go shoppe. Und wommer so dur de H&M gloffe und uf Dütsch diskutiert hend, hhani mi wieder gfühlt wie ide Schwiz. Jedesmal wenn denn öpper uf Spanisch öppis gseit het, bini voll irritiert gsi. Nacher hemmer eus denn mit ihrere Familie troffe zum Zmittag esse. Das Erlebnis het mir denn zeiged, dass ich obwohl ich mich scho fschd als Galizierin fühle, kei ahnig han was typischs galizischs Esse isch. Und ganz ehrlich, Tintefisch, oder Sardine samt em Chopf und allne Gräte bruchi au nid uuumbedingt. Da bini doch grad wieder froh, um die wenig ussergwöhnliche Sache wos i minere Familie z esse git! :)
Z'abig simmer denn mitem Anton in Usgang (Und mitde Ana und de Fabiola, aber die hend ufgeh am 2 :P) Am nächschte Tag hani mi denn mitde andere Ustuschschüeler vo minere Region troffe und zu mim grosse Entsetze het mis Englisch scho recht abbaut.
Nach dem Wuchenend isch denn mini erscht richtig Prüefigswuche losgange. Gschicht, Philosophie und Mathe. Vorallem vor Gschicht am Mittwuch hend all so Angscht gha, dass sie am Zischtignamittag gschwänzt hend zum lere. Was denn dezue gfüehrt het, dass nur no Ich, de Jose, de Samuel, de Senen, de Gabriel und die 2 Brais vode Klass übrig bliebe sind. (Ja richtig, alles Type ussert ich) Es isch denn aber doch recht amüsant gsi und mir hend d Stund demit verbracht Youtube Videos z luege und s Privatlebe vode Wirtschaftslehrerin z bespreche (also mit ihre zemme).
Am Dunnschtig vorem Philosophietescht, isch die letschti Stund au na genau mit dere Lehrerin gsi. Also het sie eus ghulfe möglichscht unuffällig Sache vom Prüefigsstoff ad Wandtafle, zwüsched d Notize wo sie ide Lektion vorher gmachd het z schriebe. Also echd, wenni de gröscht Unterschied vo Spanie-Schwiz muess sege, isches momentan eidütig d Schuel!
Denn das Wuchenend, isch mini 'Tante' mit ihrne zwei Söhn cho, wo 8i und 9i sind. Mer cha sich wahrschindli vorstelle, dasses denn nüm ganz so entspannt szue und her gange isch. Vorallem z'Abig hends amel voll ufdreit. Am Samschtigmorge simmer denn all zemme de Fuessballmatch vom Miguel go luege und er het sich uuumega gfreut. Obwohls gregnet het und sie 10:0 verlore hend. (Die vode andere Mannschaft sind au viel älter gsi -.-)
Kurz bevors mich und d Ana denn aber endgültig ufd Palme bracht hend, sinds denn geschter wieder hei. Aber nid ohni mich namal vorher uu herzig z überfalle, z knuddle und sicherstelle, dass ich denn Wiehnachte mit ihne fire :)) -> Milena fühlt sich akzeptiert :P

UUuund was au namal muess gseit werde; mir hend da imfall immernanig Winter, ätsch ;)

Z' Salceda :) 

Familietreffe

Soo es wird glaub mal wieder Zit, min immer unregelmässiger werdende Blog witer z füehre :)

Letschts Wuchenend bin ich am erschte offizielle Familieesse da z Spanie gsi und wie mir scho prophezeit worde isch, hets Unmenge vo Esse geh. Usserdem hani usegfunde, dass die  Esse sogar sehr oft stattfindet, hüt nämlich au wieder. Es isch denn immer die ganz Verwandtschaft debi, hüt sogar e Cousine vo mim Gaschtvater wo sit 15 Jahr z Dütschland lebt. (Das heiss für mich, wieder mal e Konversation ohni Astrengig) Und immer im Huus vode Grosseltere, das isch riesig, eigentlich isches meh e Farm^^ Und ide Stube hets es uu schöns uralts Klavier. All Cousins und Cousine sind natürlich au debi gsi und  all hends ihres Instrument mitbracht. Aber die meischte hend sich denn nid de zue überrede lah würklich was vorzspiele, nur de Anton, wo mit grossem Gfalle jedi Melodie wonem grad dur de Chopf gange isch mit sim Horn wiedergeh het. Und denn na eini vode Cousine wo chli älter isch und eifach göttlich Klavier spielt ( Min Ifersuchtslevel isch grad dur Decki^^) Alles i allem hets es paar luschtigi Lüt drunder gha, zwei Cousine i mim Alter wo grad im Lismefieber sind und sich uu dicki Schäl lismed. (Het mer grad au Luscht gmachd, geg langwili schients super z sii :P ) Und denn ei Tante wo immer het wele ihres Englisch mit mir üebe, obwohl mis Spanisch definitv besser isch, als ihres Englisch.

Letscht Wuchenend am Sunntig, hani denn beschlosse de ganz Tag z lehre. Aber de Plan isch denn wschnell vergesse gsi wo am Morge mis Telefon lüted, e Kollegin vo AFS und sie seit: Mach dich parat, Schwümmzüg und en Zmittag, mir holed dich i 10 Minute ab. Ich natürlich na im Pijama (isch ja au erscht 11i am Morge gsi!!) mitemne huere Stress hans denn na rechtizitig gschafft. Und denn simmer, also zwei Kollegine (eini vode USA und eini us China) schnell uf Portugal abedüsed, ines Schwümmbad. Es isch mega luschtig gsi, wie immer mit ihne, will d Yingqi us China isch eifach sooo anderscht als alli Lüt vo ich kenne. A dem Tag zum Bispiel het sie mer all 10 Minute ihri Händ under d Nase ghebet, zum mir ihri Nägel zeige. Wo sie sich s 1. MAL i ihrem Lebe lackiert het! 

Und ja ich han wieder gaanz agfange ich z sii, was heisst ich han scho zwei Jagge verlore, i nur zwei Wuche. eini vo dene isch vo minere Gaschtmueter gsi. Aber nachdem ich aaall min Muet zemme gna han und es paar Telefonat uf Spanisch gfüehrt han, isch sie zum Glück wieder fürecho. 

Ide Schuel, het d Lehrerin jetzt zwei vode luutere Type us minere Klass versetzt und zwar genau vor mich, was heisst, dass ich jetzt wesentlich weniger vom Schuelstoff mitüberchum :P

Aber trotz allem, han ich mini erschti spanischi Prüefig, (und denn na Wirtschaft, heii was für en Fan vo Wirtschaft ich doch bin) mit ere gnüegende Note gmeischtere :D Es 6.75 inere Noteskala wo bis 10 gaht, also irgendwas zwüsched 4.25 und 4.5. und ich muen doch sege, ich bin recht stolz gsi :) (Mini zwei vor mir sitzende, perfekt spanisch redende Kollege, sind zum Bispiel schlechte gsi :P )

Und ja das wers eigentlich au scho gsi, un beso ;) 

Portugal is beautiful *-*

Amerikaner und Esse

Das mal weissi chum wo afange, s git so viel neus. Aber da ihr ide Schwiz ja die meischte Herbschtferie hend, fang ich mal mit minere letschte Schuelwuche ah :)
De Mäntig isch eigentlich e einzigi Diskussion gsi, wer am nächschte Tag id Schuel chunt und wer streikt. ( Es sind ebe grad Schüelerstreik z Spanie). Da mini Klass, sege mer mal, nid die aaaller fliessigschti isch, hemmer eus denn druf geiniget die nächschte drü Täg eifach all dihei z blibe.
Am Zischtig bini denn aber glich uf de glichi Bus wie immer zum mit es paar vode Schuel go Zmorge esse. Ufem Bus hani zwei Kollegine troffe, vo de andere Klass ( de fliessigere) und won ich denn chli spöter scho mitde andere imne Cafe gsesse bin, hend mer genau die zwei aglüte und gfröget wo mir sind. Sie chemed glich au und genged nid i di erschti Stund :P De Rescht vom Tag bini denn zude Raquel, was immer super isch. Will erschtens ihres Huus jedesmal voll isch vo allem mögliche Esse und au will sie Just Dance het :))
Am Mittwuch simmer denn all uf Vigo ad Demonstration und obwohl ich keine vode Slogans verstande han, isches na luschtig gsi und ich meine hauptsach schreie.
Am Dunnschtig, hend all wieder Schuel gha oder müesse go schaffe, ussert de Miguel und ich. Und nacheme Tag babysitte chani nur sege, himmel het de Bueb Energie! Baschtle, en Chueche bache, Film luege. Bi ihm passt irgendwie alles i ein Morge ine.
Zum Glück han ich aber am Fritig immerna kei Schuel gha, sondern bin uf Ponferrada anes AFS-Treffe. Am Abig vorher hani bide Julia (vo Miami, Florida ( oooh ich gahn sie so was vo mal go bsueche)) übernachted. Und ich bin plötzlich uu froh gsi, wohn ich i somene chline Dorf lebe wo niemert Englisch reded. Mitde Julia redet nämlich keis Schwein Spanisch und sie chans au dementsprechend guet. Und ich glaub ich derf doch vo mir selber sege, ich rede inzwüsche meh oder weniger guet. Viellicht au will, de Miguel und d Angela mich ihne Zungebrecher vorlese lönd :D
Was denn a dem Wuchenend cho isch laht sich liecht zemme fasse: Amerikaner und Esse! Meh als d H´lfti vo allne Camp Teilnehmer sind schreiendi, lachendi und eifach geniali Amerikaner gsi. Es isch eifach nie nüt gloffe. Aber au all vode andere Länder sind so lieb gsi, vorallem mitde Solveig, einere vo Island hanis jetzt mega guet und ich han scho allne gseit ich chämi sie denn mal i ihrem Land go bsueche. Natürlich hemmer denn aber die drü Täg nüt anders gredet als Englisch. (Und zwar i amerikanischem Slang) Min Chopf isch jetzt na voll devo. Aber eeeendlich isch au wieder mal chli Dütsch füre cho, wonich d Milena (nid ich selber^^) wieder gseh han. De erschti Mensch vo dihei, sit faschd 2 Mönät und endlich wieder läschtere uf Schwizerdütsch, het also guet tah. :D
Nebet einige komische Spieli, wie 'Yo Man, Yo Bitch' oder Nazipolizei hets vorallem viel esse geh. De erschti Zmittag zum Bispiel: Zerscht emal Lasagne, rechti Stück verstaht sich und mer het au mehrmals chöne go hole. und w denn all fertig gsi sind, Pouletschenkel mit Pommes. Ich mein ich weiss ja nid, aber für mich isch Lasagne scho es recht fertigs Menu. Und denn, zum gaanz sicher gah, dass mir au ja alli platzed na Pudding und Ananas zum Dessert.
Hüt ide Schuel bini denn plötzlich au namal chli beliebter gsi, dank de Schoggi woni vo dihei übercho han :P

Und joa abgseh devo dass jetzt Prüefige afanged, isch s Lebe grad echd guet :)

Mir sind d' Galizier :)

Vampiro!

Soo, ich glaube es wird doch wieder mal Ziit für es Blog-Update :)) Fangemer mal bi hüt vorere Wuche ah. Wie immer am Mäntig hani die erschte zwei Stunde Sport gha, die zwei Sache wommer im erschte Halbjahr mached und für d Note zelled: Fuesball und Usduurlauf. (Tschau hoffnig uf e gueti Sportnote^^) D Lehrerinne vo Gallego und Wirtschaft hend a dem Tag gfählt und da Wirtschaft die letscht Stund gsi isch, han ich nat´rlich denkt, kuuhl früener heigah. Aaaber nei, wenn da ade Schuel en Lehrer fehlt denn muesch eifach dete blibe (Chasch zwar nüt mache, aber muesch awesend si). Nachdem ich mich gnueg lang über die unsinnigi Regle ufgregt han, simmer denn glich all scho früener gange. Will ich a dem Tag aber eigentlich vorgha han grad z Porriño z blibe, zum nacher go schwümme gah, het mir das gar nid viel gnützt. Wenn nid d Raquel, vo minere Klass mich iglade het zum bi ihre esse, bisi denn am 3 is Schwümmbad gang. Wie ich glaub scho erwähnt han, wird da i minere Familie MEGA gsund gesse, also ch¨nder eu viellicht mini Freud vorstelle wo mir eus e Fertigpizza und e Lasagne in Ofe gschobe hend :D De rescht vode Schuelwuche isch denn doch au recht entspannt verbi gange, da am Dunnschtig sone art Streik (ziemlich inofiziiel und unklar gege was) gsi isch, sind vo minere Klass nur grad ich und 4 anderi id Schuel cho. (Vo allne andere Klasse het chum öpper gfehlt, aber mer het mir scho gseit gha, dass die gschiedere und vorallem fliessigere all de ander SChueltyp mached, so was mit Wüsseschaft. also hani mi nid so gwunderet.) Und am Fritig isch denn Firtig in ganz Spanie gsi und ich bin mit minere Familie und Kollege vo ihne as Meer. Zwar isches mittlerwil au da z chalt zum bade, aber wasmer immer chan mache isch esse :D Und zwar rechtig Portione, nachdem ich nach Tapas und em riese Menu won ich serviert übercho han, kei meh vode Rippli han wele wos eus uf de Tisch gstellt hend, het mini gaschtmueter lachend gseit: Ja, das isch halt Galizie, esse chömmer viel. Am Samschtig bini denn mis erschte Handballspiel go luege. Mitspiele hani aber nanig chöne, und nachdem wo ich vo minere Mannschaft gseh han, isch min Glaube dass ich das irgendwenn chan. Sie sind uunglaublich guet und wie mir en Typ, wo ich a dem tag kenne glehrt han (Während ich vorem Spiel, zemme mit mit mim Trainer und es paar andere, aber als einzigi völlig hibbelig, de Federer - Murray Match glueget han)erchlärt het, isch mini Mannschaft, vo ihrere Alterklass die 4. bescht in ganz Spanie.

Mit 18 Pünkt Vorsprung gunne :D

Und ich bin nid nur vom Spiel beeidruckt gsi, sondern au vode Zuschauer. Die hend sich benoh wie bi eus amne Fuessballmatch vode Profis, mit Pauke und Vuvuzelas, und nid z vergesse die hitzige schreiende und vorallem fluechende Spanier :D De Lacher vode Wuche hets denn hüt während Gallego geh. Ufd Frag vode Lehrerin, nachemne Tier wo sich vo Bluet vo andere ernährt, rüeft eini us minere Klass ganz luut: 'VAMPIRO!

Uuund ja langsam chert chli de Alltag i, ich chan scho chum meh Dütsch rede, ohni spanischi Wörter dri z mixle und wenn mer Kollege vo AFS schriebed, uf englisch, fangi jeeedesmal ah uf spanisch antworte^^ Aber ich nimm mal ah, das isch e guets Zeiche :D

Vamos Chicas :D

El Clásico!

Hüt isch de 30igschti Tag. Da i mim Zimmer, i minere Wohnig im 3. Stock ade Strass Rosalía de Castro, z Salceda. In SPANIE! Ich bin jetzt scho en ganze Monät da, aber so richtig glaube chanis immer nanig.

Es hend sich so viel Sache veränderet. Vonere treue Ahängerin vo allem Fast Food und Fleisch, in ich jetzt faschd zur Vegetarierin worde. Vonere Vollziittänzerin zunere Vollziithandballerin ( mit Bei voll vo blaue Flecke). Mathe hass ich nid nur nüme, es isch jetzt mis Lieblingsfach. Anstatt dass mich d Lehrer ermahned will ich so viel rede, sind jetzt immer all ganz überrascht wenn ich mal öppis sege. Wenn jetzt amig mis Telefon lüted bini jedesmal zerscht mal es wili verwirrt, wieso de ander Spanisch redet. Und ganz en wichtige Punkt: Zum go shoppe gahts nüme uf Winterthur, sonder uf Vigo.

Euse Täschetransport

Das isch nämlich das, was ich geschter gmacht han. Zemme mit de Ana und de Fabiola simmer am Mittag id Stadt. Es isch doch na en rechte Grösseunterschied und d Läde gönd eim bi Gott nid us :D Nach guet 4 Stund Hardcoreshopping hemmer denn de Anton troffe ( Yayy, kei Täschene meh träge), hend eus öppis ztrinke und es Glace kauft ( Ja, mir wered eus immerna degege dass de Summer jetzt enn ume isch) und sind am Hafe as Meer gesse. En Fischer ide Nöchi het Musig laufe lah und da han ich e schrecklichi Entdeckig gmachd. Logischerwis isch de gröschti Teil vode Lieder wos da losed glich wie bi eus und es sind au ¨ppe die gliche Sache wo jede uswendig chan. Wie zum Bispiel de Refrain vo 'Whistle'. Was mir aber nid klar gsi isch, isch dass s Niveau im Englisch z Spanie nid langed zum de Text verstah. Das heisst sie hend kei Ahnig was sie da die ganz Ziit singed. ( Yayy, so ¨ppis hani scho immer wele uf Spanisch erchlere :P).
Wo mir eus denn spöter am Abig uf de Heiweg gmachd hend, sind de Anton und ich ufem Weg zude Buststation es bizeli verlore gange. Grad wommer de andere hend wele alüte wo sie plötzlich sind, isch eus ufgfalle, dass d Haltestell direkt uf de gegenüberliegende Strassesite isch. Uf de andere Site vonere 4 spurige Strass mitemne riese Haag ide Mitti. Also heissts wiiter laufe und hoffe das doch irgendwenn mal en Zebrastreife chunt. Gott sei dank, isches denn doch nid allzu lang gange bis mer eine gfunde hend. nach sicher 5 Minute wo euses Liechtsignal eifach nid het wele grüen werde, hemmer eus denn agfange ufrege. Bis de Anton plötzlich mega afangt lache und uf de Chnopf zeiged wo rechts vo mir isch. Nachdem mer de druckt hend, isches denn relativ schnell grüen worde und nach namal einige Umweg simmer denn doch auscho ade Haltestell acho. Die andere sind scho es Wili dete gsi und seged völlig gschockt, dass de letschti Bus scho gfahre isch. Da mis Spanisch immernanig soo ganz usgrift isch, han ich erscht begriffe, dass sie eus en Seich ageh hend, wo denn de Bus cho isch^^.
Usserdem han ich s erschti Mal Paella gesse und obwohls idem  Gricht einigi Sache drin het, vo dene ich naanig ganz genau gwüsst han, wie mer die um Himmelswille söll esse, isches echd fein :D
Und denn ( was dich sicher interessiert, Papi ;) ) hani die Wuche mini erschti politischi Diskussion gha. Bis dete isch mir nid ganz klar gsi, wie präsent d Krise da isch. Die Jugendliche kenned all die wichtige Politiker und sie chönd der meischtens scho sege für wers denn wählend wenns chönd. Usserdem reged sie sich mega uf, über die viele Chürzige bide Bildig und e Demonstration isch scho in Ussicht. Aber obwohl mich d Ana iglade het au mit ihne Schuel z schwänze und mit zgah, glaub ich dass da doch namal passe.
Was ich aber uf gar kein Fall verpasse isch 'El Clásico' hüt Abig, das heisst s Spiel 'Madrid - Barcelona'. Zum das gseh, treffed sich nämlich hüt alli Lüt ide Bars. Und ja mal luege wer glücklich heichunt, d Ana oder de Miguel :))

Gaaaaaaanz wenig Sache hemmer kauft :D

Gelobt sei der Sport

So de folgendi Post isch jetzt mal nur über ein Tag, aber defür en lange. :)

Er het geschter am 7ni am Morge agfange, ich bin chli langsam gsi mit parat mache und han na en huere Stress gha zum rechtzitig dune uf de Strass stah, wo ich mich jede Morge mit minere Nachberin (sie heisst Carla) triffe zum de Bus id Schuel neh. Nur komischerwiis, isch d Carla a dem Tag nid cho. Nachdem ich es Ziitli gwarted han, hani langsam Angscht übercho, dass ich de Bus verpasse und bin drum scho gange. Ganz knapp hanis denn na gschafft. Z Porriño acho, hani na e Halbstund müesse warte, will de Bus immer so viel z früe achunt. Woni denn bide Schuel acho bin, hets scho s' erscht Mal gschället gha und niemert vo dene wo ich kenne het meh dusse gwarted. Aber ich han denkt jaanu und ha mich uf de Weg i mini Klass gmachd. Erscht uf halbem Weg isch mir denn igfalle, dass ich ide erschte Stund Französisch han und zwar nid i mim Klassezimmer. Also han ich mich ufd Suechi nachem Franzzimmer gmachd ( Wer mich und min Orientierigssinn kennt, weiss wie ungefähr mini chance gstande sind^^). Nachdem d Gäng immer leerer und ich immer verzwfileter worde bin, han ich mich denn entschiede bim Lehrerzimmer go fröge z gah. Nuuur s Problem, wo isch s Lehrerzimmer? Zum Glück isch mir denn grad im Gang en Lehrer entgege cho und hend sich miner agnoh. So bini schlussendlich mit 10 Minute Verspötig und em nette Kommentar vo mim Retter: 'Ich han da na eini wo verlore gange isch.' ide Klass acho.
D Schuel a dem Tag isch bis am 18.10 gange, aber wo sie endlich fertig gsi isch bin ich nanig heigange. Eini vode Sache won ich nämlich am aller meischte vermisse isch Sprt z mache! Und e Kollegin vode Parallelklass hett mer gseit sie nämi mich suscht mal mit is Handball. Also het sie das gmacht und Himmel ich muen sege ich han de Sport doch es biiiiiiizeli unterschätzt. Arrogant wie ich bin, hani denkt, jajoo hemmer ja au scho öppe gspielt ide Schuel, ich weiss so ungefähr wies lauft.
Nur dass s Niveau i dere Mannschaft so höch isch, hani nid gwüsst. Bi dem Spieltempo bini aso bim beschte Wille nid nacho. Und ohni jetzt irgendwie de Sport wele z beleidige (Ich finden hammer), das isch ja eis Gemetzel! Ich kenn zwar nanig so ganz alli regle, aber es schient mer als gäbs nid würkli viel Ischränkige bezüglich Körperkontakt. Die andere hend mich amig schier umghaue und ich denke die hetted ganz schön müesse lache, wennds gseh hetted was mini Sportlehrerin ide Schwiz amel scho als Foul pfiffe het.^^
Aber wie au immer, trotz mim afängliche Schock, isches eifach genial und ich fang uf jedefall ah. Hüt, genauso wie morn und übermorn gangi wieder is Training. ( alles under 4mal ide Wuche wär ja langwilig :P) Und ja das heisst ich bin jetzt uf jedefall beschäftigt. :D

Soodeli na es chlises Endfazit. Obwohl ich nachere relativ lange Skypesession am Sunntig, doch echli Heiweh becho han und mis Ziel, nach eim Monät spanisch z rede doch chli z'höch gsteckt gsi isch, gahts mer immer besser und es bedüted mer u viel, dass doch so viel min Blog lesed, danke :) 

S'Huehn oder s'Ei?

So wieder e Wuche verbi und mittlerwil weiss ich scho so ungefähr wies da ide spanische Schuel lauft.

Zwar schiened mich immerna relativ wenig z'bemerke. Und das obwohl letscht Wuchenend ade 'Fiestas de Porriño' (Porriño isch de Ort, won ich id Schuel gang) mich immer weider Lüüt verwirrt hend, wo mich z kenne schiened, ich aber na nie gseh han. Alli hend chli öppis mit mir wele schwätze oder zumindescht im verbilaufe grüeft: 'Eh, Suiza!' De bescht Kommentar woni a dem Abig ghört han isch gsi: 'Oh, sie chan ja rede!' Ja, tatsächlich chan ich^^
Mittlerwile hani nämlich sogar agfange chli Gallego z verstah, nonig allzu viel, aber immerhin. Leider hemmer euses erschte Diktat i dere Sprach scho gschriebe, bevor mim Afangeverstah-punkt gschriebe. Während ich nid mal de Text verstande han und fliessich Wörter erfunde han, isches bide andere drum gange ob mer d'Wörter mit 'b' oder 'v' schriebt. Tönt komisch? Ich chan eu sege de Unterschied zwüsched dene zwei Buechstabe i Gallego ghörsch nid!
Mit Philosophie hemmer unterdesse au agfange und ich muen sege e isch na voll intressant. I irgendeim Fach muen ja das mitm Ei und em Huehn klärt werde. Leider han ich denn eimal en ganze chline Moment nid ufpsasst, will mini Banknachberin mir öppis verzellt het und genau i dänn het mich mini Lehrerin gseh. Da sie i dere Stund scho eine vor Tür gstellt het, han ich lieber eifach mal nüt gseit, uf ihri Frag, vo was sie grad verzellt heg. Aber da het plötzlich eine us minere Klass gseit: 'Sie verstahts ebe nid.' Und d Lehrerin mit kritischem Blick dreiht sich zu minere (absolut nur spanisch sprechende) Banknachberin und fröget: 'Demfall hender uf Englisch mitenand gredet?' Und die nickt natürlich ganz ifrig, so denkt jetzt mini Philospophielehrerin, ich redi keis Wort spanisch, obwohl ich sie ziemlich perfekt verstahn. Gueti Sach :D
De Dunnschtig bin ich denn scho s zweite Mal go schwümme. De einzigi Sport won ich bis jetzt chan mache leider :/ Aber ich muess sege es isch scho kuuhl, jedesmal wenni usem Wasser stiege fühl ich mich wieder wienen Mensch und nid wienen sportschüche Härdöpfäl. ^^ Woni s erschte Mal gange bin, han ich mich zwar ooberstrub gfühlt, da badchappe und schwümmbrülle obligatorisch sind. Woni mich im Spiegel aglueget han, hani zerscht mal denk: 'Hui, en Frosch.' Aber wills ja ebe obligatorisch isch und all so usgsehnd, ischs mer denn schnell nüme peinlich gsi und ich chan nur sege. Schwümem mit Schwümmbrülle, 10000 mal besser :D
Und ja ich chan usserdem drü neui Kollege minere nanig soo lange Lischte vo Lüt woni würklich kenne, hinzuefürge. Erschtens mal de Ana ihre Cousin, Anton wo eifach genial isch. Und a all wo wüssed was mis absolute LieblingsWii- Spiel isch. Er hät das :D ( Und chan au alli tänz uswendig, Nina ;) ) Und denn na Zwei us minere französisch Klass, Maria und Raquel wo au super sind. Die hütigi Franzstund hemmer demit verbracht e Reise mit Interrail z plane. (6 Länder, meega viel Städt und 1. Klass natürlich: Como somos ricas!)

D Ana, de Anton, und d' Hevellin ( spricht sich Evelyn :D )

Acabado :)

Dini Mueter!

So die erschti Schuelwuche hani jetzt doch auscho überstande :))

De erschti Schueltag het mit französisch agfange, also schomal nid schlecht. Immerhin öppis wonich verstahn. Mini Lehrerin für das fach heisst Lourdes. Jawohl, z Spanie seit mer allne Lehrer de Vorname, obwohl mer de denn chum brucht sonder eifach rüeft: Profe!
Die ganz erschti Stund hemmer jedefalls derfe dezue verwende z lere wie mer sich vorstellt, so a la 'Comment tu t'appelles' oder 'Quel age as-tu?' En relativ gmüetliche Start also. Die zweiti Lekrion wer denn Gallego gsi. Was namal e anderi Sprach isch, verglichbar mit Portugiesisch und vo dere ich absolut nüt verstahn. Aaaaber da ich und d Carla, mini Nachberin wo zum Glück ide gliche Klass isch, eher chli verwirrt sind und drum z spat cho sind. het eus d Lehrerin us de Klass gschmisse, so dass mir hend chöne e Stund ufem Gang warte. Die einzige simmer aber nöd gsi, en andere vo eusere Klass isch au scho dete gsesse :D
Denn isches witer gange mit Gschicht, wo mir denn au wieder debi gsi sind. De Lehrer isch absolut dure, aber ich finden super. Und wuuhu au das Fach isch in Gallego. Nachemne Ziitli het denn de Lehrer gmerkt, dass er mit mir genauso guet japanisch chönt rede und het drum all paar Minute wieder e pause gmacht, mich aglueget und gseit: Tranquila, Tranquila!
D Fächer in Spanisch sind denn verglichswis super gange. Ich verstahn eigentlich alles, abgseh vo dem i Wirtschaft, aber ob das jetzt nur ade Sprach lieht isch e anderi Frag.
D Pausene sind immer nach jedere zweite lektionm 20 Minute. Und ganz ehrlich es isch am Afang nid so mini Lieblingszit gsi, da ich ja weder öpper kennt, na mit öpperem han chöne rede. De erschti SChueltag isch denn am 18.10 endlich fertig gsi und ich chan nur sege, es het glanget!
De zweiti Tag isch scho viel besser gsi und das nid nur will er am halbi 3 fertig gsi isch . Wo d Lüt ide Schuel usegfunde hend, dass ich us de Schwiz bin, hend immer meh agfange mit mir rede und mir Frage stelle. Die eint Pause isch es Meitli zu mir cho und seit: ''Ich chan imfall es paar Sache uf Dütsch.'' Das isch nid s erschte mal gsi, wo mir irgendwer het wele zeige was für dütschi Wörter sie chönd und denn chömed meischtens so Sache wie 'guten Tag' oder 'Haus'. Aber was sie denn bracht het, het alles übertroffe: Dini Mueter! seit sie eifach uf Schwizerdütsch :D
Vom Franz het mich mini Lehrerin scho wele befreie, aber ich ha den gfunde, lieber chli eifachs Französisch, als namal e Stund i Spanisch, mitere andere Klass.^^ Denn ide Stund nacher, wo Englisch gsi isch, hani min erschte richtige Kolleg ade Schuel gmachd, abgseh vo vier Meitli us mim Dorf woni scho vorher chli kennt han. Er heisst Mario und sitzt hinder mir. Will er wiederholt, het er ide meischte Fächer keis Problem und erchlert mir immer alles, ussert i Englisch, da isches umgekehrt.
Am Dunnschtig die Wuche, isch denn dene i minere Klass ufgfalle dass ich Englisch chan. So isch mir d Ehr zu Teil worde, d Ufzgi vode halbe Klass entweder z korrigiere oder grad z mache :D
Denn dihei, het mir mini Gaschtmueter mitteilt, dass öpper für mich aglüte het. Und zwar d Gaschtmueter vomene Meitli vom AFS-camp, mitdere ich zwar faschd nie gredet han, wo aber grad recht deprimiert isch. Sie het nämlichna gar kei Spanisch gha und hets drum recht schwer. So het ihri Gaschtmueter ghofft ich chönti sie chli ufheitere. Da ich da mega Glück gha han mit allem, hani gseit gern. Au wenn ich nanig ganz sicher bin wie ich mit ihre chan rede, da sie vo Island isch. :D

Sum up: D SChuel gfallt mer jede Tag meh, je meh Lüt ich kenne lehr. Und mis Spanisch het sich au scho wieder recht verbesseret. Vor allem aber isches super, mal was z tue ha.

Keep Calm and Carry On

So ich bin jetzt scho über e Wuche da, und es sind so viel neui Sache, da hani denkt ich fang mal ah chli alles ufschriebe :)

Am Fritig, em 7.9.2012 isches für mich losgange, zemme mit drü andere Meitli vode Schwiz bini uf Madrid gfloge. Scho bim Gate isch eus die riesigi (unglaublich luuti^^) Gruppe vo Amerikaner ufgfalle, alli mit AFS t-shirts. Wie sich usegstellt het, hemmer is gliche welcomincamp wie sie ghört. Oder besser gseit, sie hend 2/3 vo eusem Camp usgmachd.
Wommer ide Jugenherberg acho sind, isch mir scho s erschtmal de Unterschied zwüsched Spanier und Schwizer ufgfalle. D Zimmer sind nämlich nach Regione ufteilt gsi und demit mein ich nur nach Regione, nid zerscht nach Manne und Fraue. Das het dezue gfüehrt, dass min einzige Zimmergnoss en Amerikaner namens Jonah gsi isch. Mir hend eus aber zum Glück super verstande, vorallem will er en riese Schwizfan isch. Er het sich z Züri am Flughafe auscho mit mindeschtens emne kilo Schoggi ideckt :D

Min chline Brüeder

Mit ihm und 7 andere isches denn am nächschte Tag im Zug witergangen. Faschd 6 Stund hemmer gha, aber mit em Jonah und na zwei andere Amerikanerinne ischmer jedefalls nid langwilig worde. (Und Schoggi hemmer ja au gha ^^) Z Santiago hend mich denn mini Gaschtmueter und Schwöschter erwartet, d Angela und d Ana. D Angela het mich denn gfröget ob sie jetzt am erschte Tag na söll englisch mit mir rede, aber us irgendemne Impuls use hani gseit nei und drum het sie sit do au nie mit mir englisch gredet. Mir sind denn nid direkt hei, sondern i ihri Feriewohnig am Strand, wo de Alfonso und de Miguel scho gwartet hend. Sie sind zwar alli mega herzlich gsi, aber ehrlich gseit bin ich so erschöpft gsi, ich han nur na wele is Bett.
Am nächschte Tag woni verwachet bin, het d Ana nebed mir no gschlafe, drum hani denkt ich blib auna chli liege. Wommer denn ufgstande sind, isches 2 am Namittag gsi!! Aber z Spanie isch das anschienend normal, jedefalls het sich niemert gwunderet :D
Nach zwei Täg am Strand hemmer eus denn uf de Weg gmachd nach Salceda, mis neue Dihei :) Wenn ich mich bis denn nanig in Miguel verliebt han, spötischtens denn bin ich ihm verfalle! Er het nämlich grad agfange mir alli sini Büecher und Fuessballsache zeige (Er isch en riese Barcelonafan, aber d Ana het mich zu sim Unmuet scho ufd Madrid-site zoge) und denn hets sogar na es Flötekonzert geh. :D Er isches au gsi wo mir bim erschte Zmorge, e Tasse mitem Udruck: Keep Calm and Carry On anegstellt het. Was gli zu mim Motto worde isch.
Na am erschte Abig het mich denn d Ana mit gno ihri Kollege z treffe, was bedüted eigentlich s ganze Dorf, vo dene eigentlich scho praktisch alli gwüsst hend, dass ich chume. Und POR DIOS! Wenn du dennksch nach zwei Jahr Spanisch verstasch echli öppis, denn seg ich dir jetzt: Nei machschh du nid! Ich bin zerscht mal total überforderet gsi. De einzigi Satz wos immer wieder gseit hend und ich au verstande han isch gsi: Oh, was für cooli Haar :D
Richtig losgange isches denn aber erscht am Wuchenend. S Vorurteil dass Spanier gern fired: Bestätigt! (Obwohl dass alli chönd tanze scho, was die meischte da tanze nenned wür ich eher als 'kreischend uf und ab hüpfe' bezeichne :D )
Mir sind am Fritig nach Vigo, wommer hend chöne bide Ana ihrem Cousin übernachte. Obwohl übernachte wohl chli s falsche Wort isch, da mir die ganz Nacht eigentlich nid dihei gsi sind, sondern erscht am Morge. Am nächschte Tag isch denn es Dorffeschd gsi, grad im Ort nebed Salceda, wommer anschienend au nid het dörfe verpasse. Wills vo dete kein Bus git, hemmer denn bi emne Kolleg im Zelt gschlafe. Wieder en Tag spöter, won ich eigentlich nur na ha wele schlafe, simmer denn ad Geburtstagsparty vomene Kolleg. (Und a alli mini Kollege, ja das tönt supercool gell? aber ich seg eu, es chan au z viel si^^ ohni mir immer wieder z sege; Keep Calm and Carry On, hetti das Wuchenend glaub nid duregstande) Da ich am Sunntig denn scho würkli gnueg gha han, vorallem vo Spanisch ghöre und probiere rede, bin ich ziemlich still gsi. Wo sich denn eine beschwert het, dass ich nid mit ihm rede und ich ihn ufgforderet han mir öppis z verzelle, hani wieder mal e überraschig erlebt. Statt nämlich öppis über sich z verzelle, het er mir mini halb Lebensgschicht uftisched. Uf min völlig verwirrte Blick hetter denn gantwortet: Ja, z Salceda bisch du berüehmt. :P

Also alles i allem: Es gfallt mer mega, ich han namal e Wuche länger chöne de Summer gnüsse und d Lüt sind eifach toll. Aber es isch echd astrengend und trotz allem spanischi Büecher lese, wirds wohl na es bizli gah, bis ich mich würklich chan verständige. Aber jaa, heicho wirdi sicher nanig grad ;)