Camino de Santiago

Wie im Flug sind die Oschterferie verbi gange, ines paar Täg wird d Schuel scho wieder afange und zum erhole hani na chum Ziit gha. Ich han nämlich d Wuche demit verbracht en Teil vom Camino de Santiago z mache. Für all wos nid wüssed, das isch en ganz lange Weg wommer (meischtens) z Fuess macht, bis uf Santiago zude grosse Kathedrale, er het verschiedeni Afäng, unteranderem au ide Schwiz, uf Dütsch heisst er Jakobsweg.
Jedefalls han ich mit öppe 30 andere Ustuschschüeler 120kilometer devo gmacht und ich chan eifach nur sege, es isch unglaublich gsi! Die einte wüssed viellicht, dass ich i de letschte Mönät nid immer so begeischteret gsi bin vo AFS, ja ich mich mengisch sogar wahnsinnig über d Organisation ufgregt han. Aber ich muen sege ich bereus kein Moment, dass ich mich agmeldet han. All vo eus sind so verschiede und voed ganze Welt, aber es isch glich als würemer eus scho ganz und gar kenne, all die AFSer sind eifach mini zweiti  Familie. Und alles wasmer i dere Wuche zemme duregmacht hend, het das Gfühl nur na verstärcht.
Am erschte Tag wommer eus all mit eusne riesige Rucksäck, de obergrusige Wanderstiefel und de riese Regeschütz parat gmacht hend für die erscht Etappe (24km) hemmer eus, oder jedefalls ich mich, uuunglaublich lächerlich gfühlt. Aber scho nachemne Wili isch d Lune eifach super gsi, s Wetter isch trotz de Regegüss ab und zue würkli guet gsi und motiviert simmer sowieso gsi. Uf halbem Weg hend ich und mis Grüppli denn es paar Ire kenne glehrt und mir hend es Wili mitneh gredet. Ihre irisch Akzent isch eifach zum sterbe luschtig gsi :P Und das isch denn nid s einzige Mal gsi, wo mer Lüt ufem Camino kenne glehrt hend, es  isch eifach so gsi, dass mer halt mit allne chli afangt rede und das isch uf jedefall mega interessant! Eimal wo zwei Kollegine und ich erschöpft ine Bar sind go Wasser poschte, simmer zum bispiel mitem Wirt is Gspöch cho und am Schluss hetter eus als chlini Wegverpflegig nid nur gueti Wort sondern auna grad gratis Brownies mitgeh :D

De zweiti Tag isch denn scho chli anderscht gsi, es het gregnet und grengnet und gregnet und nüme ufghört, de ganz Bode isch ufgweicht gsi und ich glaub niemert vo eus isch au nur es bizli troche blibe. Umso grösser isch natürlich d Erliechterig vom z Abig ide Herberg acho gsi und ich die guet Luune vo dem Abig/Nacht isch echt chum na z übertreffe gsi. Usserdem sind all chli all am massiere gsi, will eus eifach alles weh tah het. Aaaber das isch natürlich alles na nüt gsi im Gegesatz zum nächschte Tag, dasmal sind 30km ufem Plan gstande und es het abegleert wie nüt. De ganz Bode isch so ufgweicht gsi, dassmer s Gfühlt gha hend, mer versinki jetzt denn im Schlamm. und spötischtens wenn dini Schueh sich wie chlini Ozean agfühlt hend, jedi vo dine Chleiderschichte durchnässt und dini Haar plotschnass gsi sind, isches der eifach nur na sche*** egal  gsi wied eigentlich usgesch und über d Erinnerig dasses mir am erschte Tag na peinlich gsi isch de grusig Plastikponcho gege de Rege azlege, hani nur na chöne lache. Nachem Zmittag sind denn de Albert en Kolleg vo Barcelona und ich chli z spaat wieder losglofe zum wie immer mitde erschte Gruppe mitzhalte und wo eus plötzlich ufgfalle isch, dass mir zude hinderschte ghöred, hemmer gfunde das chans nid si, euses Tempo azoge und versuecht die vorderschte wieder izhole. Mir sind so schnell gsi, dass mer öppe 6 kilometer pro Stund gmacht hend, was mit dene Rucksäck, em Rege, em rutschige Bode und immer wieder de Hügel wommer duruf hend müesse (obwohl ich zuegib, dass da de Albert mir mengisch mitem Rucksack ghulfe het :P) nid all zu liecht gsi isch. Jedefalls hemmers gschafft und sind denn zemme mit de 1. Gruppe acho, wodure ich mich nid nur mega stolz han chöne fühle, sondern au zerscht go dusche, Gott sei Dank!
Naja ich wird jetzt nid na allzu feschd uf Detail igah ich chan nur sege, absolut alli hend die ganze Füess vo Blase gha, die meischte simmer nur na ghumplet, eusi Chleider sind immer so durchweicht gsi vom Rege, dass sie nid emal über Nacht tröchnet sind, all eusi Schueh sind so volle Schlamm gsi, dass mer sie chum na het chöne vonenand underscheide und a Muskelkater hets bi Gott au nid gmanglet. Aber de Moment, wenn du nach 5 Täg voller Astrengig und Liide endlich z Santiago achunsch, die letscht Strass aberennsch und denn endlich vor de Kathedrale stasch, isch eifach unbeschrieblich und entschädigt für alles!
Es isch eifach e unbeschrieblichi Erfahrig gsi, all neue Lüt woni troffe han, all neue Wanderlieder und immer de befriedigendi Moment wennd am Abig vomne lange Tag ide Herberg acho bisch. Es isch eifach öppis uf das ich richtig stolz bin und egal wie viel mir glitte hend, ich wills uf jedefall namal mache!

Sunne hets nur am 1. Tag gha :P

Endlich z Santiago!

VAMOS CELTIÑA!

Huui ich gib zue ich bin i letschter Zit viel z fuul gsi zum witeri Blogs schriebe, aber jetzt hani doch namal e gschicht wo sich glaub lohnt zum schriebe :)

Am letschte Sunntig, isch z Vigo de Fuessballmatch Celta Vigo - Real Madrid gsi. Und ich ha mir natürlich scho ein Monet vorher es Ticket kauft und han mich meeeega gfreut, und ich muen sege es het sich sooowas vo glohnt!
Mir sind z 7. gange, alles AFS-Ustuschschüeler und mir hend gfunde wenn mer eus scho gsehnd denn machemer grad es ganzes Wuchenend drus. Also bin ich scho am Fritig uf Vigo und han mich mit ihne troffe. Am Samschtigabig simmer natürlich scho all voller Vorfreud gsi, wo de Jonah, wo au an Match cho isch, aber am Samschtig nid z Vigo übernachted het eus es SMS schriebt: ICH TRIFF DE PRESIDENT VO REAL MADRID!

C.Ronaldo signierti T-Shirts!

Am Afang simmer überzügt devo gsi, dass er eus verarsche will, aber denn hemmer em aglüte und er het eus verzellt was ihm passiert isch; Und zwar het er ufem Zug vo Vigo zu sich hei en Kolleg troffe und de widerrum isch mit Kollege unterwegs gsi. DEnn hends halt echli gredet und es isch usecho dass de Vater vom einte Kontäkt zu Real Madrid Lüt het und dass er am Sunntigmorge mit einige vo ihne es Meeting het. Also het de Jonah, wien er halt so isch, eifach gfröget; Ja, chan ich echt mitgah? Und d Antwort isch tatsächlich ja gsi, was denn dezue gfüehrt dass er am nächschte Morge chli mitem Presidänt vo Real Madrid plauderet het. Und nid nur das, er het ihm au na sis T-shirt chöne mitgeh, so dass ers de Spieler bringt zum unterschriebe. Zum das denn go abhole, simmer am 6i am Treffpunkt gstande wos ihm gseit hend, aber denn isch und isch eifach niemert cho zum s T-shirt bringe und mer hend denkt, oke gömmer schomal ine und denn warte mer dete. Also hemmer das gmacht, aber denn hends eus es paar Agstellti weg gschickt und gfunde: NEI NEI, da bide Türe chöner nid warte. Und mir hend völlig verzwiflet versuecht ihne z erchäre wieso mir dete sind, aber niemert het eus recht wele zuelose. Denn eendlich, wo de Jonah scho völlig panisch gsi isch, dass er jetzt doch nid zu sim T-shirt chunt, het eus en junge Agstellte zueglosed. Und er het denn gfunde, er chöngi eus zwar nid helfe will er kei Autoritätsperson seg, aber er zeigi eus suscht wod Loge vom Presidänt und de andere wichtige Lüt isch und au wenn mir dete natürlich nid iechömed, chönts ja si dass eus öpper gseht und de Jonah erchent. Mir sind also zu dere Loge und hend versuecht uf eus ufmerksam mache und iiirgendwenn (wo mir eus scho ziemlich lächerlich gfühlt hend) hends eus endlich bemerkt und de Herr President het gseit mir selled ide Pause da ane cho zude Loge und denn gebi er am Jonah sis T-shirt. Das hemmer denn gmacht und was sölli sege, nur bisli wichtig simmer eus vorcho :P vorallem wos eus denn nacher im Ernschd eini gfrögt het womer sones T-shirt chaufe chöng. Ich meine klar, es het ja a jedere Egge Ständ vo original signierti T-shirt vom Cristiano Ronaldo verchaufed! (NICHT) Mir hend natürlich all es Foti mit dem T-shirt wele, drum hemmers all schnell agleit. DA mir aber Celta Vigo und nid Real Madrid Fans sind, het das gheisse dass mir euses Celta T-shirt und de Celta schal gege es Madrid Libli gwechslet hend und denn wieder zrug und das zmizzt während em Spiel. Ich muen sege, d Lüt hend es gaaaanz es bizeli kritisch glueget. :P
Aber was sölli sege, ich han mer en Traum erfüllt, es isch eifach super gsi. Mir hend die absolut beste Plätz ide vorderste Reihe gha und mir hend all die Spieler wo mer scho ei Million mal im Fernseh gseh hend, direkt vor eus spiele gseh. De Cristiano Ronaldo, de Kaka, de Özil, de Pepe, eidach all direkt vor dinere Nase!

Usserdem isches recht luschtig gsi will zwei vo miner Kollegine üüüberhaupt nid drus cho sind, Ich meine sie hend mer vorher scho gseit, dass sie nüt vo Fuessball verstönd, aber ersch während em Match selber isch mer klar worde dass wenn das en Nicht-Europäer seit nachli e anderi Bedütig het. Die beide Meitli (Amerikannerin und Chinesin) hend KEI ahnig gha wie das Spiel überhaupt funktioniert, öppe so wie wenn en durschnitts Europäer American Football oder sowas luegt. Ich mun sege ihri absolut Verwirrig und ständigi Usrüef: 'Hääh, was isch jetzt passiert?! Milena, wieso hetter das gmacht?!? ' sind relativ amüsant gsi :D

Fasnacht uf Spanisch

Soo jetzt isch endlich de ganz Stress umd Fasnacht wieder verbi. Ich seg eu, da i mim Dorf isch das de wichtigscht Alass vom Jahr und es wird so richtig glebt! Und da mini Gaschtschwöschter das au macht, hani jetzt einiges z verzelle. 

Chli usserhabl vo Salceda hets da zwei Viertel, O Barreiro und A Feira. Sobald d Fasnachtszit afangt, enstaht zwüsched ihne en Chrieg. DEnn fanged d Vorbereitige für de grossi Tag ah, jedes vode zwei Viertel will s andere übertrumpfe, mit möglichscht ifallsriche Kostüm, de beschte Tänz und natürlich de idrucksvollschte Karrosse.

Will mini Grosseltere vom Barreiro sind, bin ich dete ufgnoh worde. Sie hend denn natürlich immer wieder drüber Witz gmachd, wie viel sie für de Transfer vo de Schwiz i ihres Team hend müesse zahle. 

S erschte isch gsi, s Thema uswähle, i eusem fall d Mayas. (weg dem ganze rummel um de Weltuntergang) Das Thema isch absolut gheim gsi, mer hets NIEMERTEM wo nid ide Karnevalsgruppe mitgmachd het derfe verzelle. De chline Chind sind sogar d Auge verbunde worde bim Kostüm aprobiere, so dass au jaa nüt duresikeret. 

Denn hend also d Vorbereitige agfange und während d Manne vom Viertel ide chline Lagerhalle vom Kulturzentrum Barreiro d Karrosse zemmebaut , d Müetere und Grossmüetere imne Zimmer d Kostüm gnäht und d Musiker d Lieder igstudiert, hend mir (idemfall d Kategorie vode nanig verhüratete Fraue^^) agfange d Schueh und de Chopfschmuck baschtle, genau so wie mehreri Tänz istudiere und probe. Ihr chönd eu wahrschindli vorstelle, dass das alles einigi Ziit in Aspruch gnoh het. Das heisst, nachem vode Schuel heicho ischs immer grad ab is Barreiro gange, genau so wie am Wuchenend. Eifach jedi frei, verfüegbari Minute bini dobe gsi, mengisch so lang dass mer am 12i ide Nacht beschlosse hend e Pizza z bestelle zum gnueg Energie ha zum nachli wiiterschaffe. 

Und denn isch endlich alles parat gsi und s Karnevalswuchenend isch da gsi. Das am Fritig und Samschtig gfiret worde isch, verstaht sich wahrschindli vo selber, aber denn s richtig grosse Feschd isch am Mentigabig gsi. Oder besser gseit die zwei grosse Fäscht. Eis im Barreiro und eis ide Feira und da die Viertel nid aallzu wiit usenand sind, sind d Lüüt denn die ganz Nacht vom einte zum andere pendlet. Aber nid nur wege dem isches es speziells Fescht gsi, sondern au will jede verchleidet cho isch, möglichscht so dass mer dich nid erchennt. Will wennd erchennt worde bisch, hends agfange dich z veräpple. Das heisst wenn du eine vo dine Kollege erchennt hesch, bisch zunem ane und hesch agfange ihm Streich z spiele und z verwirre, will er ja dank dinere Maske nid weiss wer du bisch. Ich bin als Hello Kitty gange, was denn na zunere relativ luschtige Situation gfüehrt het. Plötzlich het mich nämlich eine agsproche und agfange mich voll rede i aber uf Gallego, so dass ich relativ wenig verstande han. Ich han aber trotzdem probiert seehr interessiert z würke und denn ab und zue mit 'MIAU' gantwortet. So lang bises ihm z dumm worde isch und er wieder gange isch. Obwohl ich absolut nid chan verstah wieso er das kei super Konversation gfunde het. So um die 7ni hemmer denn gfunde es wird langsam Ziit fürs Bett, vorallem will ja am näschte Tag de gross Umzug ufem Plam gstande isch.

Also simmer nach 5 Stund Schlaf am 12i am Mittag wieder im Barreiro gsi, dasmal i volle Kostüm, zum eus Schminke lah. Aber leider hets denn agfange rede und alles isch abblase worde. S allererschte Mal wo das passiert isch, logisch genau wenn ich dete bin, buff... Sie hends denn uf de Samschtig verschobe, won ich aber es absolut obligatorischs Treffe vo AFS gha han. Wo die vode Karnevalkommission das ghört hend, hend sich aber sofort all total agfange für mich isetze und minere Ustuschorganisation azlüte. Sie hend gfunde sie chemed mich eigehändig z Santiago go abhole wenns müess si. Und so hanis denn au gschafft, am Fritig uf Santiago, am Samschtigmorge wieder zrug und z Nacht namal hi. Und es het sich glohnt!

d Tänzerinne

De Umzug het im Barreiro agfange, die gross Karrosse z forderscht, denn mir Tänzerinne und denn die zweit Karrosse mitem Orcheschter. So simmer bis is Zentrum vo Salceda, denn dete vorem Rathuus simmer stah blibe, hend namal tanzed und denn hends agfange e Asprach halte. Das heisst die vom Barreiro hend über d Luutsprecher Witz drüber gmacht wie lächerlich die vode Feira sind und umgekehrt. Denn aschlüssend ischs wieder zrug gange bis det wommer gstarted sind. Und ich seg eu, nach guet 4 Stund i Absätzschueh tanze, bini eifach kaputt gsi, mir het aaalles wehtah, vorallem min Chopf mit dem 5kg Chopfschmuck, aber glich es isch eh hammer Erfahrig gsi und ich han mich faschd wie z Brasilie a Karneval gfühlt! Eifach super!

Mir sind also na VIEEEL meh gsi als nur die :)

Felices Fiestas

Soo ich bin grad debi die letscht Wuche vo mine Ferie z gnüsse, was mir wieder mal Zit laht en Blog z schriebe :)
 Die erschti Wuche vo mine Ferie hani mit minere spanische Familie ide Totana verbracht. Das isch gaaaanz im Süde vo Spanie, also chönder eu s Wetter wahrschindli vorstelle, Sunne, Sunne, Sunne. Jede Tag meh als 20 Grad :D
Und nid nur weg dem sind d Wiehnachte seeehr anderscht gsi vo dem won ich kenne. Ich weiss chum wo afange mit verzelle. Aso was für mich am atemberaubenschte gsi isch, isch s Huus vo mine Gaschtgrosseltere. Es isch eifach RIESIG! Nebed 14 Schlafzimmer, hets na e Igangshalle, e Chuchi, ich weiss nid wie viel Badzimmer, e Stube, en Esssaal, es Chinderspielzimmer, en Pingpongruum und denn anstatt en Garte en Park. So gross dassd die ganz ohni Problem chasch verirre und volle mit Orange und Manderindlibäum (was heisst es het immer alles nach Manderindli gschmökt, mhhh :) ) Usserdem mitemne Schwümmbad, aber trotz em super Wetter isches na z chalt gsi zum das z bruche.

Dezember ide Totana :D

Wenn er eu jetzt au nur annährend d Grössi vo dem Huus chönd vorstelle, verstahts sich vo selber, dass die ganz Verwandtschaft guet det ine passt het, zum Wiehnachte verbringe. Vo ganz Spanie und sogar Dütschland sind Lüt cho. Und ich chan nur sege, mit sonere spanische Familie zemme wohne isch es Highlight, vorallem wenns 20 Lüt i eim Huus sind! Immer eis Chaos (aber vode guete Sorte) und liebgmeints umegestritte (nid nur weg de chline). Und usserdem isch faschd immer irgendöpper am Klavier ide Igangshalle gsesse, so dass mer im ganze Huus Musig ghört het.

Dank eim vo mine chline Cousin, wo grad Starswars für sich entdeckt het, hemmer beschlosse gha en Marathon mit de Starwarsfilm z verastalte. Also het sich jede Namittag/Abig, die ganz Familie ide Stube, im improvisierte Kino versammlet und mir hend im Lauf vode Woche di 6 Film glueged. (das erchlert au grad euses Hauptgspröchsthema vo dene Ferie :P )
A Heiligabig nachem Znacht hend denn all ihri Schueh id Stube gstellt und d Türe isch abbschlosse worde. Jetzt hets gheisse warte, bis mer am nächschte Morge chan go luege was die drü heilige Könige (wo da z Spanie d Gschenk verteiled) bracht hend. Will d Stubetüre erscht ufgmachd worde isch, wenn die ganz Familie wach gsi isch, chönder eu vorstelle wie am duredreihe mini chline Cousin gsi sind wo d Ana und ich wie immer gaaaanz lang gschlafe hend. Irgendwenn hends es denn nüm usghalte und hend agfange vor eusere Türe Wiehnachtslieder z singe, ähm oder nei Wiehnachtslieder schreie triffts besser. Aber es isch echt genial gsi, will die Chline na würklich 100% devo überzügt sind, dass es die Heilige drü Könige sind wo d Päckli bringed. Sie hend sogar drüber diskutiert wie dumm die Lüt sind wo öppis anders behaupted, ich meine als würed d Eltere ide Nacht go Gschenk poschte und denn anetue, vorallem da im Dorf, das gaht ja gar nid. :P (echd wos das gseit hend bini schier abe)

Silveschtertruube

Ich ha würkli schier nüme hei wele so sehr hani mich i die typisch Südländischi Familie verliebt, aber für Silveschter hemmer ja wieder z Salceda müesse si, zum mit de andere Grosseltere esse. Das isch au es Erlebnis gsi, nachemne Znacht mit meh Esse, als mer sich chan vorstelle hend sich denn churz vor Mitternacht all mit emne Shäleli Truube vorem Fernseh versammlet. So hemmer d live glueget wie ganz Madrid vorde berüehmte Uhr versammlet gsi isch und bi jedem Schlag e Trube gesse het. S gliche hend mir dihei au gmachd. Wers schafft alli 12 Trube z'esse, dem bringt das nämlich Glück fürs neue Jahr. Aber ich seg eu so schnell hinderenand all Trube z esse ohni sich z verschlucke isch gar nid so eifach, vorallem wennd na muesch lache will irgendöpper bi jedem Schlag dummi Sache uf 'französisch' rüeft :P ( ja min Gaschtvater und sini Brüeder sind es paar ganz luschtigi^^)
Nach all dem sind denn d Ana, zwei vo de ältere Cousine und ich in obere Stock eus go umzieh zum nacher in Usgang. Was da i Spanie heisst, fiire bis am nächschte Morge und denn direkt go zmorge esse ( Chocolate con Churros, mhhh ;)) woni denn über de Mittag eeendlich dihei gsi bin, bini grad is bett und bis am 7ni am Abig nüme ufgstande :P

Schnell go poschte

so es wird dringend emal wieder Ziit zum en Blog schriebe. I letschter Ziit bini erschtens nid würkli dezue cho und zweitens isch eh langsam alles echli Alltag und es git nüm jeeedi Wuche so viel neus z berichte.

Die Wuche hemmer jetzt die letschte Prüefige gha und ich hoff doch schwer dass ab jetzt all chli entspannter sind. Ich mein vor es paar Wuche het na min chline 8- jährige Brüeder mit ganz ernschthaften Gsicht gseit: 'S Lebe isch hert.' und all mini Kollege vode Schuel hend vorallem ide letschte zwei Wuche chum für was anders ziit gha als lere. Aber ebe, jetzt gahts uf Wiehnachte und Neujahr zue und d Vorfreud isch riesig.
De Samschtig hend d Ana, ich und na zwei Kollegine en chline Usflug uf Santiago gmachd, ines riesigs Ichaufszentrum, zum eusi Outfits für Silveschter z chaufe. Bevor ich uf Details igha schnell e churzzemmefassig vo was mir gmacht hend: 1. Mit suuper tolle Luune z Santiago acho 2. völlig veregnet werde und aaall eusi ichäuf ufem Bode versträue 3. Mit fremde Lüt a ihrem Stubestisch sitze, fernseh luege und Pizza esse.

Smoothie & Frosen Yoghurt

Aber jetzt mal na vo Afang ah. Will mer da z Spanie chum de Zug brucht, sind bini Kollegine scho z Vigo a Bahnhof völlig überdreht gsi und hend meh fotis gmachd, als Japaner uf Reise. Eusi eh scho gueti Luune, isch denn durd Decki sobald mer im Ichaufszentrum acho sind. Es het eifach alles gha und isch so gross gsi, dass mer Müeh gha hend eus nid z verlaufe. Denn het euse riese Sache ussueche und Zügaprobier- Marathin agfange. Ich chan nur sege fühlsch dich dete wien en Star. Usse a dini Umkleidekabine wird din Name gschriebe und ine drin hets en Chnopf wod chasch drucke, zumd Verchäuferin rüefe wennd öppis bruchsch.
Nach guet 5 Stund hemmer denn all euses Züg zemme gha und sind na in obere Stock es Frozen Yoghurt und en Smoothie go hole. Wommer denn aber usem Ichaufszentrum usesind zum de Bus han Bahnhof ne hets agfange regne. Uf öppe halber Strecki zum Bahnhof hemmer denn gmerkt dass es sauknapp wird mit em Zug und bi dem Glück wommer gha hend isch d Bushaltestell nid mal genau bim Bahnhof gsi. Also stiege mir us und renned i vollem Tempo los, immerna belade mit nöch a ei Million vo Täschene. Die Täschene sind us Papier gsi und die Tatsach i Kombination mit em Rege het gar nid chöne guet cho. I vollem Sprint hets eus alles zerrisse und eusi gaaanze Ichäuf sind uf de nasse Strass verteilt glege. Mir hend denn alles eifach packt und sind mit dem Züg ide Ärm wiiter grennt. Ich will mer chum vorstelle wie lächerlich mir usgseh hend, aber uf jedefall hani scho lang nüm so feschd glached. :D

Zmizzt ide Nacht, a irgendme Bahnhof

Wommer denn am Bahnhof acho sind, die nächschte guete Neuigkeite, de letschti Zug isch scho vor öppe ere Halbstund abgfahre, genau so wie jede Bus und alli andere Fahrglegeheite wo eus au nur id Nöchi vo Vigo hetted chöne bringe. Mir sind denn halb gschockt, halb amüsiert zerscht mal eifach chli verwirrt dete gsesse. S Bahnhofspersonal het sich scho agfange Mitleid z ha und sie hend eus denn sogar neui Plastiktütene bsorgt zum wenigschtens all eusi Sache wieder chöne izpacke. Denn isch de Nerea zum Glück in Sinn cho, dass sie mal es Meitli imne Lager kenne glehrt het wo z Santiago wohnt. Zum dere ihri Nummere usefinde het sie denn ihrere Tante aglüte und die het eus aber direkt a es Pärli wo sie kennt verwiese wo au dete wohnt.
So isches also cho, dass en völlig Fremde eus am Bahnhof isch cho abhole und zu sich heignoh het, wo sini Frau scho debi gsi isch eus zwei Zimmer parat z mache. Denn hends eus e Pizza bstellt und mir hend die halb Nacht mit ihne über dies und das gredet (under anderem über ihri 2 Reise id Schwiz, wos mal amne Tag 80 Franke für Schoggi usge hend :D ) Denn simmer mit usglehnte Pijamas go schlafe gange und am näschte Morge wommer ufgwacht sind, isch de Zmorge scho ufem Tisch gstande. Nach einere Million Mal Danke sege, hends eus denn uf de Zug bracht.
Alles i allem: FUE LA HOSTIA! so sache passiered au immer mir ^^

Ana, Nerea und d Fabiola i eusem 'Hotelzimmer'

Vo Schwänze und Spicke

S letschte Wuchenend isch sone richtigi Usziit vo Spanie gsi. Es isch wieder mal sones langs gsi, mit 4 Täg, drum bini denn scho am fritig Morge id Stadt uf Vigo und bis am Samschtig Abig nüm hei uf Salceda. Das isch so s erschte Mal gsi, woni elei de Bus hi und wieder zrug gnoh han und da d Bushaltestell ¨ppe e halbstund Weg vom Zentrum entfernt isch, hani doch chli Angscht gha dass ich mich verlaufe^^. Waas denn au passiert isch, aber hey Vigo het immerhin 300`000 iwohner, da chan das mal passiere. Jedefalls hani denn nach nur eimal chli verwirrt nachem Weg fröge mis Ziel gfunde. Und zwar d' Milena :D Mit ihre bini denn als allererschts mal go shoppe. Und wommer so dur de H&M gloffe und uf Dütsch diskutiert hend, hhani mi wieder gfühlt wie ide Schwiz. Jedesmal wenn denn öpper uf Spanisch öppis gseit het, bini voll irritiert gsi. Nacher hemmer eus denn mit ihrere Familie troffe zum Zmittag esse. Das Erlebnis het mir denn zeiged, dass ich obwohl ich mich scho fschd als Galizierin fühle, kei ahnig han was typischs galizischs Esse isch. Und ganz ehrlich, Tintefisch, oder Sardine samt em Chopf und allne Gräte bruchi au nid uuumbedingt. Da bini doch grad wieder froh, um die wenig ussergwöhnliche Sache wos i minere Familie z esse git! :)
Z'abig simmer denn mitem Anton in Usgang (Und mitde Ana und de Fabiola, aber die hend ufgeh am 2 :P) Am nächschte Tag hani mi denn mitde andere Ustuschschüeler vo minere Region troffe und zu mim grosse Entsetze het mis Englisch scho recht abbaut.
Nach dem Wuchenend isch denn mini erscht richtig Prüefigswuche losgange. Gschicht, Philosophie und Mathe. Vorallem vor Gschicht am Mittwuch hend all so Angscht gha, dass sie am Zischtignamittag gschwänzt hend zum lere. Was denn dezue gfüehrt het, dass nur no Ich, de Jose, de Samuel, de Senen, de Gabriel und die 2 Brais vode Klass übrig bliebe sind. (Ja richtig, alles Type ussert ich) Es isch denn aber doch recht amüsant gsi und mir hend d Stund demit verbracht Youtube Videos z luege und s Privatlebe vode Wirtschaftslehrerin z bespreche (also mit ihre zemme).
Am Dunnschtig vorem Philosophietescht, isch die letschti Stund au na genau mit dere Lehrerin gsi. Also het sie eus ghulfe möglichscht unuffällig Sache vom Prüefigsstoff ad Wandtafle, zwüsched d Notize wo sie ide Lektion vorher gmachd het z schriebe. Also echd, wenni de gröscht Unterschied vo Spanie-Schwiz muess sege, isches momentan eidütig d Schuel!
Denn das Wuchenend, isch mini 'Tante' mit ihrne zwei Söhn cho, wo 8i und 9i sind. Mer cha sich wahrschindli vorstelle, dasses denn nüm ganz so entspannt szue und her gange isch. Vorallem z'Abig hends amel voll ufdreit. Am Samschtigmorge simmer denn all zemme de Fuessballmatch vom Miguel go luege und er het sich uuumega gfreut. Obwohls gregnet het und sie 10:0 verlore hend. (Die vode andere Mannschaft sind au viel älter gsi -.-)
Kurz bevors mich und d Ana denn aber endgültig ufd Palme bracht hend, sinds denn geschter wieder hei. Aber nid ohni mich namal vorher uu herzig z überfalle, z knuddle und sicherstelle, dass ich denn Wiehnachte mit ihne fire :)) -> Milena fühlt sich akzeptiert :P

UUuund was au namal muess gseit werde; mir hend da imfall immernanig Winter, ätsch ;)

Z' Salceda :) 

Familietreffe

Soo es wird glaub mal wieder Zit, min immer unregelmässiger werdende Blog witer z füehre :)

Letschts Wuchenend bin ich am erschte offizielle Familieesse da z Spanie gsi und wie mir scho prophezeit worde isch, hets Unmenge vo Esse geh. Usserdem hani usegfunde, dass die  Esse sogar sehr oft stattfindet, hüt nämlich au wieder. Es isch denn immer die ganz Verwandtschaft debi, hüt sogar e Cousine vo mim Gaschtvater wo sit 15 Jahr z Dütschland lebt. (Das heiss für mich, wieder mal e Konversation ohni Astrengig) Und immer im Huus vode Grosseltere, das isch riesig, eigentlich isches meh e Farm^^ Und ide Stube hets es uu schöns uralts Klavier. All Cousins und Cousine sind natürlich au debi gsi und  all hends ihres Instrument mitbracht. Aber die meischte hend sich denn nid de zue überrede lah würklich was vorzspiele, nur de Anton, wo mit grossem Gfalle jedi Melodie wonem grad dur de Chopf gange isch mit sim Horn wiedergeh het. Und denn na eini vode Cousine wo chli älter isch und eifach göttlich Klavier spielt ( Min Ifersuchtslevel isch grad dur Decki^^) Alles i allem hets es paar luschtigi Lüt drunder gha, zwei Cousine i mim Alter wo grad im Lismefieber sind und sich uu dicki Schäl lismed. (Het mer grad au Luscht gmachd, geg langwili schients super z sii :P ) Und denn ei Tante wo immer het wele ihres Englisch mit mir üebe, obwohl mis Spanisch definitv besser isch, als ihres Englisch.

Letscht Wuchenend am Sunntig, hani denn beschlosse de ganz Tag z lehre. Aber de Plan isch denn wschnell vergesse gsi wo am Morge mis Telefon lüted, e Kollegin vo AFS und sie seit: Mach dich parat, Schwümmzüg und en Zmittag, mir holed dich i 10 Minute ab. Ich natürlich na im Pijama (isch ja au erscht 11i am Morge gsi!!) mitemne huere Stress hans denn na rechtizitig gschafft. Und denn simmer, also zwei Kollegine (eini vode USA und eini us China) schnell uf Portugal abedüsed, ines Schwümmbad. Es isch mega luschtig gsi, wie immer mit ihne, will d Yingqi us China isch eifach sooo anderscht als alli Lüt vo ich kenne. A dem Tag zum Bispiel het sie mer all 10 Minute ihri Händ under d Nase ghebet, zum mir ihri Nägel zeige. Wo sie sich s 1. MAL i ihrem Lebe lackiert het! 

Und ja ich han wieder gaanz agfange ich z sii, was heisst ich han scho zwei Jagge verlore, i nur zwei Wuche. eini vo dene isch vo minere Gaschtmueter gsi. Aber nachdem ich aaall min Muet zemme gna han und es paar Telefonat uf Spanisch gfüehrt han, isch sie zum Glück wieder fürecho. 

Ide Schuel, het d Lehrerin jetzt zwei vode luutere Type us minere Klass versetzt und zwar genau vor mich, was heisst, dass ich jetzt wesentlich weniger vom Schuelstoff mitüberchum :P

Aber trotz allem, han ich mini erschti spanischi Prüefig, (und denn na Wirtschaft, heii was für en Fan vo Wirtschaft ich doch bin) mit ere gnüegende Note gmeischtere :D Es 6.75 inere Noteskala wo bis 10 gaht, also irgendwas zwüsched 4.25 und 4.5. und ich muen doch sege, ich bin recht stolz gsi :) (Mini zwei vor mir sitzende, perfekt spanisch redende Kollege, sind zum Bispiel schlechte gsi :P )

Und ja das wers eigentlich au scho gsi, un beso ;) 

Portugal is beautiful *-*